Жәнібек Әлімханұлы Хамза Ширазбен WBO титулы үшін жұдырықтасады

Жәнібек Әлімханұлы екінші орта салмақта WBO чемпионы Хамза Ширазбен жұдырықтасуы мүмкін. Қазақстандық боксшы ұйымның осы салмақтағы титулына міндетті үміткер ретінде бекітілді.

Бұған дейін орта салмақта WBO және IBF белбеулерін иеленген Жәнібек Әлімханұлы чемпиондық атағын бес рет қорғаған. WBO ережесі бойынша мұндай жетістігі бар боксшылар салмақ дәрежесін ауыстырған жағдайда титулға үміткерлер арасында басымдыққа ие болады.

Осылайша, WBO Әлімханұлының өтінішін қолдап, даниялық Якоб Банктың дәл осындай мәртебе алу туралы талабын қабылдамады.

Енді қазақстандық боксшының командасы Хамза Шираздың өкілдерімен келіссөз жүргізуі керек. WBO тараптарға жекпе-жек шарттарын келісу үшін 20 күн уақыт берді.

Егер осы мерзім ішінде мәміле жасалмаса, чемпиондық айқасты ұйымдастыру құқығы промоутерлік сауда арқылы анықталады.

Біздің серіктес: Sport12kz